Skessuhorn:

Opinn fundur Samfylkingarinnar á Akranesi í kvöld

9. febrúar 2010

Þingflokkur Samfylkingarinnar leggur land undir fót í vikunni og heldur í fundaferð um allt land undir yfirskriftinni Samstaða um endurreisn. Þetta er þriðja fundaferð þingmannanna á sjö mánuðum þar sem landsmönnum er boðið uppá milliliðalaust samtal um þau stóru og viðamiklu úrlausnarefni sem unnið er að. Í kvöld, þriðjudagskvöldið 9. febrúar verður fundur haldinn á Akranesi að Jaðarsbökkum og hefst hann kl. 20:00. Framsögumenn eru Guðbjartur Hannesson, Ólína Þorvarðardóttir og Helgi Hjörvar, allir velkomnir.

Fundaferðin ber yfirskriftina samstaða um endurreisn en það er eitt af stóru verkefnunum að vinna að samstöðu landsmanna um endurreisn og bætt og betra samfélag. Einn veigamesti þátturinn í endurreisn efnahagslífsins er að ná endum saman í ríkisfjármálum, án þess að ganga hart að velferðarkerfinu og þeim sem veikast standa og helst þurfa því á stuðningi þess að halda. Ríkisstjórnin hefur staðið fyrir ýmis konar úrræðum sem nýst hafa fjölskyldum og einstaklingum í kjölfar efnahagshrunsins, auk þess hefur verið unnið að stefnubreytingu á fjölmörgum sviðum svo sem í skattamálum, umhverfismálum og sjávarútvegsmálum. Þá hefur ríkisstjórnin unnið jafnt og þétt að mikilvægum verkefnum í atvinnumálum, verkefnum sem munu vega þungt í endurreisninni.

-fréttatilkynning